
Arsenal ka vendosur në objektiv një nga yjet më të mëdhenj të futbollit botëror, Vinícius Junior. Sulmuesi brazilian është bërë dëshira kryesore e trajnerit Mikel Arteta për këtë merkato, por transferimi i tij do të kërkonte një investim rekord.
Sipas raportimeve nga BBC, Arteta është shumë i interesuar për të afruar yllin e Real Madridit dhe drejtuesit e Arsenalit po shqyrtojnë mundësinë e një lëvizjeje konkrete për të.
Megjithatë, për të siguruar shërbimet e Viníciusit, “Topçinjtë” do të duhet të thyejnë rekordin britanik të transferimeve. Aktualisht, rekordi mbahet nga Alexander Isak, për të cilin u paguan rreth 145 milionë euro.
Edhe pse Vinícius Junior ka vetëm edhe një vit kontratë me Real Madridin, klubi spanjoll nuk dëshiron ta humbasë brazilianin me parametra zero sezonin e ardhshëm. Për këtë arsye, madrilenët do të kërkojnë një shumë jashtëzakonisht të lartë për ta lejuar largimin e tij.
Gazetari David Ornstein kishte raportuar më herët se Arsenali po eksploron mundësinë e transferimit të Viníciusit, ndërsa tani mbetet për t’u parë nëse lojtari do të rinovojë kontratën me Real Madridin.
Bisedimet mes klubit dhe futbollistit pritet të rinisin në ditët e ardhshme, pasi Vinícius të rikthehet nga pushimet. E ardhmja e brazilianit mbetet një nga çështjet më të nxehta të merkatos së verës.
