“Askush të mos tallë Napolin dhe napolitanët”, Conte shpërthen pas humbjes në Champions

Trajneri i Napolit, Antonio Conte, nuk i ka kursyer fjalët e forta pas humbjes në fushën e PSV Eindhoven. Që menjëherë pas fishkëllimës së fundit, tekniku italian ka lëshuar një mesazh të qartë: “Askush të mos tallë Napolin dhe napolitanët.”

Sipas të përditshmes italiane Il Mattino, gjatë takimit me skuadrën të mërkurën, më 22 tetor, Conte ka shprehur hapur pakënaqësinë e tij për sjelljen e disa prej lojtarëve të rinj, duke iu referuar atyre që në Holandë i quajti “nëntë kokat”, një term që nënkuptonte mungesën e përqendrimit dhe reagimet nervoze në fushë pas pasimeve të gabuara.

Megjithatë, pavarësisht kritikave të ashpra, grupi është i bashkuar dhe e gjithë vëmendja është tashmë te sfida ndaj Interit, që mund të peshojë shumë në garën për titullin kampion.

Conte nuk ka ndërmend të bëjë revolucion në formacion. Sistemi 4-1-4-1, që lejon bashkëjetesën në mesfushë të Kevin De Bruyne dhe Scott McTominay, pritet të ruhet edhe në takimin e ardhshëm në “Diego Armando Maradona”. Mund të rikthehet Rasmus Hojlund, ndërsa pjesa tjetër e formacionit do të mbetet pothuajse e pandryshuar.

Mesazhi i Contes është i prerë: të gjithë duhet të rreshtohen pas tij dhe të luftojnë me shpirt për fanellën. Në Napoli, asnjë devijim nga urdhri i “gjeneralit” nuk tolerohet, sidomos tani, me Interin në horizont dhe Scudetton në lojë.