Atletico Madrid ka regjistruar barazimin e dytë radhazi në La Liga, duke u ndalur në shtëpi nga Villarreali me rezultatin 2-2. Skuadra e Diego Simeones e shmangu humbjen vetëm në minutat e fundit të takimit të zhvilluar në “Metropolitano”.
Madrilenët e nisën me vështirësi sfidën, por arritën të kalonin në avantazh në fillimin e pjesës së dytë. Pubill realizoi golin e parë dhe dukej se Atletico kishte marrë kontrollin e ndeshjes.
Villarreali reagoi fuqishëm dhe përmbysi rezultatin brenda pak minutash. Gerard Moreno barazoi në minutën e 66-të nga pika e bardhë, ndërsa pak më vonë Atletico mbeti me 10 lojtarë pas kartonit të kuq të Le Normand.
Në minutën e 78-të, Villarreal fitoi një tjetër penallti dhe Mikautadze nuk gaboi, duke i dhënë skuadrës së tij avantazhin 2-1.
Në fund, pavarësisht inferioritetit numerik, Atletico reagoi dhe gjeti golin e barazimit. Ishte Giuliano Simeone, djali i trajnerit Diego Simeone, që realizoi për 2-2 dhe i dha skuadrës së tij një pikë.