Atletico Madrid vendos një rekord në Botëror, 10 lojtarë të klubit në finalen Spanjë-Argjentinë

Atlético Madrid vazhdon të shkruajë histori në Kupën e Botës. Për herë të tretë radhazi, klubi madrilen është skuadra me më shumë futbollistë të pranishëm në finalen e turneut më të madh të futbollit botëror.

Një arritje e tillë ishte regjistruar edhe në finalet e vitit 2018 dhe 2022, ndërsa këtë herë numri është edhe më mbresëlënës. Plot 10 lojtarë të Atlético Madridit do të jenë pjesë e finales së Botërorit 2026 mes Spanjës dhe Argjentinës, duke i dhënë klubit mundësinë të barazojë një rekord historik të të gjitha kohërave.

Nga radhët e Spanjës, “Los Colchoneros” do të përfaqësohen nga Marcos Llorente, Marc Pubill, Álex Baena dhe afrimi i ri Alejandro Grimaldo, i cili sapo është bashkuar me klubin.

Ndërkohë, në kampin argjentinas janë gjashtë lojtarë të Atlético Madridit: Juan Musso, Giuliano Simeone, Thiago Almada, Nahuel Molina, Nico González dhe Julián Álvarez.

Prania kaq e madhe e lojtarëve të një klubi në një finale të Kupës së Botës është një tregues i ndikimit të Atlético Madridit në elitën e futbollit ndërkombëtar.

Historikisht, finalet e Botërorit kanë prodhuar përballje të paharrueshme. Nga triumfi i parë i Uruguait ndaj Argjentinës në vitin 1930, te finalet moderne si ajo e vitit 2018 mes Francës dhe Kroacisë apo dueli dramatik i vitit 2022 mes Argjentinës dhe Francës, turneu ka dhuruar gjithmonë emocione të mëdha.

Tashmë, në finalen Spanjë-Argjentinë, Atlético Madrid do të ketë një arsye të veçantë për të ndjekur sfidën, pasi një pjesë e madhe e lojtarëve të tij do të luftojnë për trofeun më prestigjioz në futboll.