Barcelona fiton me “poker” ndaj Huesca-s dhe shkon në -4 nga Atletico (VIDEO)

Barcelona përfiton nga ndalesa e Atletico Madrid duke marrë një fitore të thjeshtë 4-1 ndaj Huescan. Skuadra e Koeman parakalon Realin në renditje dhe ngushton në vetëm 4 pikë diferencën me Atleticon e Madridit, që kryeson me 63 pikë.

Dy gola dhe një asist për Lionel Messin, që vazhdon të kryesojë garën për golashënuesin më të mirë të La Ligas me 22 finalizime dhe 8 asiste. “Pleshti” zhbllokoi takimin që në minutën e 13-të, i shërbyer nga Busquets, ndërsa Griezmann çoi shifrat në 2-0 me një super gol, të realizuar nga distanca në minutën e 35-të. Para se skuadra të shkonin në dhomat e zhveshjes shkurtoi diferencën (2-1) Mir me 11-metërsh.

Në të 53-tën gjeti rrjetën edhe i riu Mingueza, i cili shfrytëzoi më së miri krosimin e Lionel Messit. Në kohën shtesë 6 herë fituesi i Topit të Artë realizoi golin që vulosi fitoren 4-1 të “blaugranave”.