Barcelona luan “tenis” ndaj Sociedadit, Messi shkëlqen me dopietë (VIDEO)

6 gola për fitoren e pestë radhazi në La Liga. Barcelona vijon formën fantastike, duke marrë një fitore të thjeshtë 6-1 në transfertën ndaj Real Sociedad. Skuadra e Koeman do të zhbllokonte sfidën në fundin e pjesës së parë duke shënuar dy gola në harkun e 5 minutave. Griezmann dhe Dest ishin autorët e golave.

Në fillimin e pjesës së dytë amerikani shënoi dhe golin e tretë ndërkohë që tri minuta pas tij Messi konkretizoi më së miri një asist shumë të bukur të Busquets. Në minutën e 71-të ishte kohë për një gol të francezit Dembele që vendosi firmën e tij.

Në minutën e 77-të, Barrenetxea shënoi një super gol me një goditje në hyrje të zonës, po që do të kishte vlera sa për statistika. 2 minuta nga fundi Lionel Messi konkretizoi një aksion fantastik të Jordi Alba-s nga krahu i majtë. Barcelona me këtë fitore ngjitet në vendin e dytë me 62 pikë, 4 më pak se Atletico Madrid. /R.Lika-Koha Jone/