Barcelona mund me manita Bilbaon dhe shkon në finalen e Superkupës

Barcelona e  Hansi Flick ka prerë biletën për në finalen e Superkupës së Spanjës, duke dhuruar spektakël 5-0 nsaj Athletic Bilbaos.  Një ndeshje pa shumë histori, e mbyllur praktikisht brenda 38 minutave të para, ku katalanasit treguan forcë, ritëm dhe cilësi të lartë loje.

Edhe pse Lamine Yamal e nisi takimin nga stoli, Barcelona hyri në fushë “zjarr”. U deshën vetëm 22 minuta që Ferran Torres të zhbllokonte rezultatin, duke i hapur rrugë një pjese të parë dominuese. Tetë minuta më pas, Fermin Lopez dyfishoi shifrat, ndërsa pak minuta më vonë Roony Bardghji realizoi golin e tretë, duke e kthyer ndeshjen në një monolog katalanas.

Raphinha ishte qershia mbi tortë në fundin e pjesës së parë, duke shënuar një eurogol spektakolar që vulosi “pokerin” dhe nxori jashtë loje një Athletic Bilbao të hutuar.

Në startin e pjesës së dytë, braziliani Raphinha kompletoi dopietën personale me golin e pestë, duke i dhënë goditjen përfundimtare takimit.

Tashmë katalanasit presin të mësojnë rivalin në finalen e Superkupës, i cili do të dalë nga përballja e së enjtes mes Real Madridit dhe Atletico Madridit. Një finale që premton spektakël, me Barcelonën që hyn si pretendente serioze pas këtij demonstrimi force.