Barcelona triumfon në super duelin ndaj Atletico Madrid dhe blindon kreun

Barcelona merr një fitore të rëndësishme në transfertë, duke mposhtur Atlético Madrid me rezultatin 2-1 në stadiumin Metropolitano Stadium, në kuadër të javës së 30-të të La Liga.

Vendasit kaluan të parët në avantazh në minutën e 39-të, kur Giuliano Simeone shfrytëzoi një asist të saktë nga Clément Lenglet, duke dërguar topin në rrjetë dhe duke i dhënë epërsinë skuadrës së tij para pushimit.

Megjithatë, reagimi i katalanasve ishte i menjëhershëm. Në minutën e 42-të, Marcus Rashford barazoi shifrat pas një pasimi të saktë nga Dani Olmo, duke rikthyer ekuilibrin në ndeshje. Në minutën 45+3, Nicolás González, u ndëshkua me karton të kuq, duke lënë ekipin e tij me një lojtar më pak për pjesën e mbetur të takimit.

Në pjesën e dytë, Barcelona rriti presionin dhe arriti të gjejë golin e fitores në minutën e 88-të. Pas një goditjeje të fortë nga João Cancelo që u prit nga portieri kundërshtar, topi u rikthye dhe u devijua nga Robert Lewandowski, për të përfunduar në rrjetë. Me këtë fitore, Barcelona forcon vendin e parë në renditjen e kampionatit me 76 pikë, ndërsa Atlético Madrid mbetet në vendin e katërt me 57 pikë.