Beccacece largohet nga stoli i Ekuadorit pas eliminimit në Kupën e Botës

Sebastián Beccacece nuk do të jetë më trajner i kombëtares së Ekuadorit. Tekniku argjentinas ka konfirmuar largimin e tij pas eliminimit të skuadrës nga Kupa e Botës 2026, ku ekuadorianët u ndalën në fazën e 1/16-ve nga Meksika.

Lajmin e bëri të ditur vetë Beccacece gjatë një interviste për DS Sports, ku sqaroi se kontrata e tij me Federatën Ekuadoriane të Futbollit përfundonte me mbylljen e rrugëtimit të ekipit në Botëror.

“Kontrata jonë skadonte kur të përfundonte Kupa e Botës për Ekuadorin dhe sot ajo ka përfunduar. Nuk arritëm të realizonim objektivin për të zhvilluar Botërorin më të mirë në historinë e vendit tonë”, deklaroi trajneri argjentinas.

Beccacece nuk e fshehu zhgënjimin për eliminimin e hershëm, duke vlerësuar njëkohësisht grupin e lojtarëve me të cilët punoi gjatë kësaj periudhe.

“Ishte shumë e dhimbshme të mos ia dilnim me këtë grup kaq të bashkuar. Nuk ishte ajo që kishim imagjinuar. Do të më kishte pëlqyer të vazhdoja edhe një ndeshje tjetër, por rezultatet janë ato që vendosin gjithçka”, u shpreh ai.

Në fund të deklaratës së tij, trajneri falënderoi skuadrën dhe stafin, duke e cilësuar kombëtaren ekuadoriane si një familje të vërtetë.

“Më duhet t’i them lamtumirë një familjeje të mrekullueshme”, përfundoi Beccacece.