Bledar Sinella, tranjeri i tretë që jep dorëheqjen nga Laçi

Bledar Sinella nuk është më trajner i Laçit. Tekniku kavajas dha sot dorëheqjen nga drejtimi i skuadrës kurbinase.

“Panorama Sport”, shrkuan se vendimi për të ndërprerë bashkëpunimin me kurbinasit erdhi pas një takimi kokë më kokë mes trajnerit dhe presidentit Pashk Laska, i cili nuk është aspak i kënaqur me rezultatet e arritura sidomos në javët e fundit.

Ky vendim i 40-vjeçarit vjen vetëm dy ditë para transfertës me Kukësin, e vlefshme për javën e 31-të të Kategorisë Superiore.

Pas kësaj lëvizjeje befasuese të presidentit Laska, te Laç presin kthimin e Stavri Nicës, një emër i njohur në futbollit shqiptar e sidomos në kampin kurbinas.

Bledar Sinella është ishte trajneri i tretë që largohet nga Laçi para se të mbyllet kampionati. Sezonin nisi më brazilianin Marçelo Troisi, i cili rezistoi deri në fillim të tetorit, për t’ia lënë vendin përkohësisht Ramadan Ndreut. Në fillim të janarit drejtimin e skuadrës e mori Sinella, i cili detyrohet të largohet gjashtë javë para fundit.

Laçi është një nga skuadrat më të rrezikuara për ta shoqëruar Korabin në Kategorinë e Parë. Por, sikur të mos mjaftonte vendi i parafundit në renditje, ekipi bardhezi tashmë duhet të bëjë llogaritë edhe me këtë situatë të papritur pas largimit të trajnerit.