Siguria ajrore është kthyer në një nga sfidat kryesore të organizatorëve të Botërorit 2026 në Amerikën e Veriut. Përveç kushteve atmosferike dhe stuhive që mund të ndikojnë në zhvillimin e ndeshjeve, autoritetet po përballen edhe me fenomenin e dronëve që fluturojnë pranë stadiumeve.
Sipas autoriteteve amerikane, deri tani janë interceptuar më shumë se 300 dronë që kanë shkelur zonat e kufizuara ajrore rreth impianteve sportive. Për këtë arsye është vendosur një politikë me tolerancë zero ndaj çdo fluturimi të paautorizuar gjatë ditëve të ndeshjeve.
Rregulloret parashikojnë ndalimin e ngritjes së dronëve brenda një rrezeje prej pesë kilometrash nga stadiumet dhe deri në një lartësi prej 1.000 metrash. Shkelësit përballen me gjoba që mund të arrijnë deri në 100 mijë dollarë, konfiskimin e pajisjeve dhe ndjekje penale.
Për të garantuar sigurinë e tifozëve dhe të eventit, autoritetet kanë aktivizuar një sërë teknologjish mbrojtëse, përfshirë sisteme bllokimi sinjali, pajisje për identifikimin e operatorëve të dronëve dhe mjete speciale për kapjen e tyre në ajër.
Megjithatë, Federal Bureau of Investigation ka bërë të ditur se deri më tani nuk është identifikuar asnjë kërcënim konkret ndaj turneut. Pavarësisht kësaj, përdorimi i mundshëm i dronëve për qëllime të rrezikshme mbetet një nga shqetësimet kryesore të strukturave të sigurisë gjatë Botërorit 2026.
Autoritetet kanë apeluar te qytetarët dhe tifozët që të respektojnë rregullat e vendosura, duke paralajmëruar se çdo shkelje do të trajtohet me seriozitet maksimal.