Brazili e nis me barazim Botërorin 2026, ndalet nga Maroku

Nuk pati fitues në përballjen mes Brazilit dhe Marokut, e vlefshme për grupin C të Kupës së Botës. Takimi u mbyll në barazim 1-1, pas një ndeshjeje me ritëm të lartë dhe emocione në të dyja pjesët.

Marokenët e nisën sfidën më mirë dhe dominuan minutat e para, duke gjetur avantazhin në minutën e 21-të. Pas një kundërsulmi të shpejtë, Brahim Diaz shërbeu saktë për Saibarin, i cili nuk gaboi përballë portës dhe dërgoi topin në rrjetë.
Reagimi i Brazilit nuk vonoi. “Seleçao” rriti presionin dhe arriti të rikthente ekuilibrat në minutën e 32-të, kur Vinicius Junior finalizoi me sukses një aksion të bukur ofensiv, duke vulosur rezultatin e pjesës së parë.

Në fraksionin e dytë, brazilianët morën kontrollin e lojës dhe kërkuan me ngulm golin e fitores, por mbrojtja marokene rezistoi me sukses. Nga ana tjetër, Maroku mbeti i rrezikshëm në kundërsulme, duke krijuar disa situata të mira për shënim.

Pavarësisht rasteve në të dy krahët, rezultati nuk ndryshoi deri në vërshëllimën e fundit të arbitrit. Kështu, Brazili dhe Maroku ndanë nga një pikë, duke lënë të hapur garën për kualifikimin në grupin C.