Brazili në ankth, dëmtohet sërish Neymar dhe rrezikon Botërorin

Frikë në Brazil për gjendjen fizike të Neymar, por sinjalet që vijnë nga stafi mjekësor i Santos duken qetësuese. Koordinatori i departamentit mjekësor të klubit, Rodrigo Zogaib, ka konfirmuar se sulmuesi brazilian ka pësuar një edemë të lehtë në pulpën e këmbës së djathtë, por pa rrezikuar pjesëmarrjen e tij në Kupën e Botës 2026. Sipas Zogaib, dëmtimi konsiderohet i vogël dhe rikuperimi po ecën sipas planit të parashikuar.

“Neymar ka një dëmtim të vogël në pulpë, një edemë. Sipas planifikimit tonë, rikuperimi i tij do ta lejojë të jetë gati javën e ardhshme, kur t’i bashkohet kombëtares”, deklaroi ai, duke larguar pjesërisht shqetësimet rreth gjendjes së yllit brazilian.

Lajmi vjen vetëm pak ditë pasi trajneri Carlo Ancelotti përfshiu Neymar në listën e 26 futbollistëve të grumbulluar me Brazilin për Botërorin që do të zhvillohet në Amerikë, Kanada dhe Meksikë. Vendimi i teknikut italian kishte ngjallur debat, pasi më herët ai kishte deklaruar se në skuadër do të ftoheshin vetëm lojtarët që ndodheshin në formën e tyre optimale.

Edema prej vetëm 2 milimetrash u diagnostikua pas humbjes 3-0 të Santos ndaj Coritiba dhe pritet ta mbajë Neymar larg fushave për rreth 5 deri në 10 ditë. Për shkak të këtij problemi fizik, ai mungoi edhe në barazimin 2-2 ndaj San Lorenzo në Copa Sudamericana.

Megjithatë, te Santos mbeten optimistë. Klubi nuk përjashton mundësinë që Neymar të rikthehet në fushë javën e ardhshme në sfidën ndaj Deportivo Cuenca, vetëm një ditë përpara grumbullimit me përfaqësuesen braziliane. Ndërkohë, sipas mediave braziliane, stafi mjekësor i kombëtares po monitoron nga afër gjendjen dhe rikuperimin e sulmuesit.