Brdaric: Kemi mësuar nga humbja e parë, di si ta mundim Laçin!

Kategoria Superiore do të nisë nesër javën e 18-të me duelin mes Vllaznisë dhe Laçit. Në “Loro Boriçi” kurbinasit do të kenë shansin që të ngushtojnë diferencën prej 10 pikësh. Trajneri i kuqebluve, Brdaric, në prononcimin gjithsesi u shpreh me optimizëm se skuadra e tij nuk do ja lejojë diçka të tillë Laçit.

“Kemi shumë energji për nesër. Jemi të përgatitur të japim maksimumin kundër Laçit. Mendoj se tri ndeshjet e fundit kanë qenë të afërta dhe terrenet shumë të vështira. Nesër luajmë në shtëpi dhe shpresoj të mos bjerë shi.

Mungesa e Krymit? Kemi një alternativë tjetër. Të gjithë janë këtu dhe të gatshëm, do të japin më të mirën. Do të jetë një ndeshje e fortë dhe duhet të jemi të përgatitur.

Jemi në një pozicion komod, të cilin e kemi merituar. Duhet të shohim përpara. E dimë se çfarë duhet të bëjmë për ta fituar ndeshjen. Kemi humbur në ndeshjen e parë, por kemi nxjerrë mësime”, deklaroi Brdaric.