Bremer lë para kohe pushimet dhe rikthehet te Juventusi

Gleison Bremer është rikthyer dy ditë më herët se sa ishte planifikuar në qendrën stërvitore të Juventusit, Continassa, duke u vënë menjëherë në dispozicion të trajnerit Luciano Spalletti.

Mbrojtësi brazilian, i cili vjen pas pjesëmarrjes me Brazilin në Kupën e Botës dhe pas lindjes së vajzës së tij të dytë, ka vendosur të shkurtojë pushimet për të nisur përgatitjet me skuadrën për sezonin e ri.

Juventusi po hyn në javën e tretë të fazës përgatitore, ku në program ka një ndeshje miqësore ndaj Nicës të premten, përpara nisjes së turneut veror në Azi dhe Oqeani.

Vendimi i Bremerit për t’u rikthyer më herët shihet si një sinjal i fortë për dëshirën e tij për të mbetur pjesë e projektit të Juventusit, pavarësisht ofertës së rëndësishme që raportohet se ka marrë nga Galatasaray.

Sipas raportimeve, klubi turk i ka ofruar mbrojtësit brazilian një kontratë me pagë prej 8 milionë eurosh në sezon, por deri tani Bremer duket i përqendruar te vazhdimësia e tij me bardhezinjtë.