Briken Calja i jashtëzakonshëm, medalje ari dhe argjendi në Europianin e peshëngritjes

Shkëlqim i madh për sportin shqiptar në arenën ndërkombëtare, teksa Briken Calja është shpallur kampion Europe në stilin e shtytjes në Kampionatin Europian të shtangës, që po zhvillohet në Batumi.

Shtangisti kuqezi zhvilloi një garë të nivelit të lartë në peshën 79 kg, duke siguruar medaljen e artë në stilin e shtytjes dhe atë të argjendtë në dygarësh. Në stilin e shkëputjes, Calja u rendit në vendin e katërt me 153 kg, të realizuara që në përpjekjen e parë, ndërsa dështoi në dy tentativat për 157 kg.

Në stilin e shtytjes, ai e nisi me një gabim në 185 kg, por arriti ta korrigjojë në provën e dytë. Në tentativën e tretë, Calja ngriti 187 kg, rezultat që i siguroi medaljen e artë, pasi rivalët nuk arritën ta tejkalonin.

Me një total prej 340 kg në dy-garësh, Calja fitoi medaljen e argjendtë, vetëm 1 kg më pak se fituesi i artë, Serobyan. Një tjetër sukses i rëndësishëm për sportistin shqiptar, që konfirmon vazhdimësinë në nivele të larta.

Në të njëjtën kategori garoi edhe Erkand Qerimaj, por pa arritur rezultat pozitiv. Ai u rendit i teti në stilin e shkëputjes me 152 kg dhe dështoi në të gjitha provat e stilit të shtytjes, duke mbetur pa rezultat në dygarësh.

Një paraqitje që rikthen në vëmendje potencialin e peshëngritjes shqiptare, falë suksesit të Caljas në këtë kompeticion europian.