Kanë mbetur vetëm pak orë nga mbyllja zyrtare e merkatos së verës, por e ardhmja e dy sulmuesve të Kombëtares shqiptare, Armando Broja dhe Anis Mehmeti, mbetet ende e paqartë.
Situata më e komplikuar duket të jetë ajo e Armando Brojës. Sulmuesi 24-vjeçar nuk u përfshi as në listën e lojtarëve për ndeshjen e fundit të Burnleyt, duke e ndjekur takimin nga tribuna.
Broja nuk raportohet të ketë probleme fizike. Vendimi i trajnerit duket se lidhet me aspektin sportiv, pasi sulmuesi shqiptar nuk ka arritur të bindë në minutat që ka marrë në dispozicion këtë sezon.
Në fillim të merkatos u përfol gjerësisht për një largim të mundshëm të Brojës nga Burnley, por me kalimin e javëve këto zëra u zbehën. Tashmë, me afatin e transferimeve që po shkon drejt fundit, mbetet për t’u parë nëse do të ketë një zhvillim të minutës së fundit për të ardhmen e tij.
Edhe Anis Mehmeti ndodhet në një situatë të ngjashme. Sulmuesi shqiptar ende nuk ka debutuar në Premier League me Ipsëich Toën. Në tri ndeshjet e zhvilluara nga skuadra e tij këtë sezon, dy në kampionat dhe një në Kupë, Mehmeti nuk ka qenë pjesë e grupit.
Për 24-vjeçarin ka pasur interes nga Birmingham City, por deri tani një transferim nuk është konkretizuar. Orët e fundit të merkatos mund të jenë vendimtare edhe për të ardhmen e tij.