Calhanoglu: Duam të vazhdojmë dominimin, të gjithë mendonin se ishim të vdekur …

Hakan Çalhanoglu është më i motivuar se kurrë për sezonin e ri. Mesfushori turk ka folur për objektivat e Interit, duke rikthyer në vëmendje edhe sezonin e kaluar dhe duke i dërguar një mesazh të qartë rivalëve.

Në një intervistë për beIN Sports, Çalhanoglu u shpreh se skuadra zikaltër synon të rikthehet te titulli dhe ta dominojë kampionatin.

“Duam ta fitojmë sërish dhe të dominojmë kampionatin”, deklaroi turku, i cili më parë ka mbajtur veshur edhe fanellën e Milanit.

Çalhanoglu nuk i kurseu as thumbimet për periudhën e fundit të drejtimit të Simone Inzaghit. Sipas tij, pas asaj që ndodhi në sezonin e kaluar, shumë njerëz e konsideruan Interin të dorëzuar, por skuadra reagoi me forcë.

“Pas asaj që ndodhi sezonin e kaluar, të gjithë na konsideronin të vdekur. Por skuadra tregoi një mentalitet të fortë dhe ne u përgjigjëm në fushën e lojës”, tha 31-vjeçari.

Një pjesë e intervistës u fokusua edhe te trajneri i ri, Cristian Chivu. Çalhanoglu bëri një krahasim interesant mes teknikut rumun dhe Inzaghit, duke vënë theksin te raporti njerëzor.

“Për Chivun, në krahasim me Inzaghin, ka më shumë rëndësi se si je si person”, u shpreh mesfushori.