Carrick rrezikon shkarkimin nga United, shtohen zërat për Conten

Vetëm një fitore në gjashtë ndeshje në Premier League ka shtuar presionin mbi trajnerin Michael Carrick. Sipas mediave angleze, drejtuesit e Manchester United po shqyrtojnë alternativat për stolin, ku në listën e kandidatëve përmenden Antonio Conte dhe Eddie Howe.

Manchester United po kalon një fillim të vështirë në Premier League, ndërsa rezultatet e dobëta kanë vënë në pikëpyetje vazhdimësinë e trajnerit Michael Carrick.

Me vetëm një fitore në gjashtë ndeshje kampionati, tekniku 45-vjeçar ndodhet nën presion dhe, sipas mediave angleze, shkarkimi i tij mund të jetë një skenar që nuk përjashtohet.

Nëse drejtuesit e klubit vendosin të ndryshojnë drejtimin e skuadrës, dy emra përmenden si kandidatët kryesorë për ta zëvendësuar: Antonio Conte dhe Eddie Howe.

Emri i trajnerit italian ka tërhequr vëmendjen, veçanërisht pas një interviste të fundit, në të cilën ai la të kuptohej se do të ishte i gatshëm të merrte drejtimin e një klubi që synon të rikthejë lavdinë e së kaluarës.

“Ka shumë klube që e kanë humbur disi lidhjen me historinë e tyre. Do të më pëlqente të shkoja te një prej tyre, për ta nxjerrë sërish në pah atë histori dhe për ta rikthyer në shkëlqimin e dikurshëm”, është shprehur Conte.

Këto deklarata kanë nxitur spekulimet për një aventurë të mundshme të italianit në Angli, në një klub me histori dhe ambicie të mëdha si Manchester United.

Conte njihet për karakterin e fortë, disiplinën taktike dhe aftësinë për të ndërtuar skuadra konkurruese. Përvoja e tij në futbollin anglez, ku ka drejtuar Chelsea-n dhe Tottenham-in, përbën një tjetër element që e bën emrin e tij tërheqës për “Djajtë e Kuq”.

Në listën e kandidatëve përmendet edhe Eddie Howe, trajneri që ka spikatur në futbollin anglez me punën e tij te Newcastle United.