Casemiro dhe Martinelli, Brazili përmbysje spektakolare ndaj Japonisë

Brazili është bërë kombëtarja e dytë që siguron një vend mes 16 ekipeve më të mira të turneut, pas një fitoreje të vuajtur 2-1 ndaj Japonisë. Ndeshja nisi me surprizë për “Seleçaon”, teksa japonezët kaluan në avantazh në minutën e 29-të. Gjithçka erdhi pas një topi të humbur nga Danilo në zonën braziliane. Kaishu Sano përfitoi nga gabimi, realizoi një aksion të bukur individual dhe me një goditje të saktë nga jashtë zone mposhti Alisson Becker për t’i dhënë epërsinë Japonisë.

Pjesa e parë u mbyll me rezultatin 0-1 në favor të përfaqësueses aziatike, ndërsa Brazili hasi vështirësi në krijimin e rasteve të pastra për gol. Megjithatë, skuadra braziliane reagoi menjëherë pas pushimit. Në minutën e 56-të, pas një krosimi të saktë të Gabrielit, Casemiro u shkëput në zonë dhe me një goditje me kokë dërgoi topin në rrjetë për të barazuar rezultatin në 1-1.

Kur dukej se sfida do të mbyllej në barazim, erdhi momenti vendimtar në minutën e pestë shtesë. Gabriel Martinelli, i aktivizuar nga stoli në pjesën e dytë, shfrytëzoi në maksimum një asist fantastik të Bruno Guimaraes dhe me një goditje të bukur mposhti Zion Suzukin për rezultatin përfundimtar 2-1.