Champions League vendos finalisten e dytë/ Bayern sfidon PSG-në pas spektaklit të parë

Gjysmëfinalja e kthimit në Champions League premton një tjetër mbrëmje të zjarrtë. Bayern Munich dhe PSG do të përplasen në “Allianz Arena”, në një sfidë që do të përcaktojë finalisten e dytë të kompeticionit më prestigjioz për klube në Europë.

Takimi i parë në Paris dhuroi një spektakël të rrallë, me francezët që triumfuan 5-4, në një ndeshje që hyri në histori për numrin e lartë të golave në një gjysmëfinale. Tashmë, PSG udhëton drejt Gjermanisë me një avantazh minimal, por me besimin e një skuadre që di të menaxhojë ndeshje të mëdha.

Nga ana tjetër, Bayern synon rikthimin e madh për të siguruar finalen e 12-të në historinë e klubit. Forma e bavarezëve në shtëpi është një armë e fortë: vetëm një humbje në 29 ndeshjet e fundit në Champions në “Allianz Arena” e bën këtë sfidë edhe më të hapur.

Statistikat shtojnë më shumë tension në këtë përballje. PSG ka kaluar turin në 14 nga 17 rastet kur ka fituar ndeshjen e parë në Europë, por bilanci ndaj skuadrave gjermane mbetet i luhatshëm. Në krahun tjetër, Bayern dominon përballjet me ekipet franceze, me një seri mbresëlënëse rezultatesh pozitive në vitet e fundit.

Gjithçka do të vendoset mbrëmjen e sotme, duke nisur nga ora 21:00, në një duel ku çdo detaj mund të bëjë diferencën mes finales dhe eliminimit.