Chelsea ka hedhur një hap të rëndësishëm drejt transferimit të Granit Xhakës. Sipas raportimeve, klubi londinez ka arritur marrëveshje të plotë me mesfushorin zviceran për kushtet personale të kontratës, ndërsa tani fokusi është te negociatat me Sunderland.
Bisedimet mes përfaqësuesve të Xhakës dhe drejtuesve të “Bluve” kanë përfunduar me sukses në një kohë shumë të shkurtër, me futbollistin që ka dhënë miratimin për projektin dhe ofertën e klubit.
Pas marrëveshjes me lojtarin, Chelsea ka vendosur kontakte zyrtare me Sunderland për të arritur edhe akordin mes dy klubeve. Nëse transferimi konkretizohet, Xhaka do të bëhej përforcimi i dytë i epokës së trajnerit Xabi Alonso, i cili pritet të marrë zyrtarisht drejtimin e skuadrës më 1 korrik.
Interesimi për Xhakën vjen pikërisht me kërkesë të Alonso-s. Trajneri spanjoll e njeh shumë mirë mesfushorin, pasi të dy bashkëpunuan me sukses te Bayer Leverkusen, ku fituan Bundesligën dhe Kupën e Gjermanisë në sezonin historik 2023-2024 pa pësuar asnjë humbje.
Megjithatë, negociatat nuk pritet të jenë të lehta. Sunderland nuk dëshiron të heqë dorë lehtësisht nga një prej lojtarëve më të rëndësishëm të skuadrës. Xhaka u transferua verën e kaluar për 17 milionë paund dhe zhvilloi një sezon të shkëlqyer, duke shënuar një gol dhe dhënë gjashtë asistime, ndërsa ndihmoi ekipin të siguronte një vend historik në Europa League.
Mesfushori me origjinë shqiptare është nën kontratë me Sunderland deri në vitin 2028, çka i jep klubit anglez një pozicion të fortë në negociata. Ndërkohë, 33-vjeçari ndodhet i grumbulluar me kombëtaren e Zvicrës në Kupën e Botës, ku ka luajtur në të tre ndeshjet e fazës së grupeve, duke kontribuar në kualifikimin e skuadrës në fazën e 1/16-ave.