Chelsea mendon për argjentinasin që po spikat te Bologna

Sipas të përditshmes italiane Il Resto del Carlino,  Chelsea ka filluar të ndjekë me interes sulmuesin e ri të Bolognës, Santiago Castro. Edhe pse deri tani nuk ka asnjë ofertë zyrtare, londinezët po monitorojnë me kujdes ecurinë e talentit argjentinas, që synon të rikthehet në kombëtaren e parë të vendit të tij.

Chelsea prej kohësh ka ndërtuar një strategji të qartë për të afruar yje të rinj nga Argjentina: në radhët e saj apo në klubet partnere janë tashmë Enzo Fernández, Facundo Buonanotte, Garnacho dhe Anselmino (i huazuar te Borussia Dortmund).

Castro, që sezonin e kaluar zhvilloi një kampionat të shkëlqyer me 10 gola në Serie A, është bërë lojtari më i ri në historinë e Bolognës që arrin këtë kuotë në elitën italiane.

Sipas një studimi të CIES, observatorit ndërkombëtar të futbollit, vlera e tij në treg mund të llogaritet mes 50 dhe 70 milionë eurove, pavarësisht se aktualisht përfiton vetëm 500 mijë euro neto në sezon.