City merr fitoren e radhës, Liverpooli është i pandalshëm në Premier League (VIDEO)

Manchester City dhe Liverpool kanë arritur fitoret e radhës në Premier League, duke e mbyllur në mënyrën më të mirë vitin 2019. “Qytetarët” fituan 2-0 ndaj Sheffield United. Golat u shënuan nga Aguero në minutën e 52-të dhe Kevin de Bruyne 8 minuta nga fundi.

Një sfidë më e vështirë nga ç’parashikohej rezultoi për Liverpoolin ajo e “Anfield”, ndaj Wolves, gjithsesi, kampionët e freskët të botës ia dolën të merrnin maksimumin e mundshëm, të ndihmuar edhe nga sistemi VAR, që u anuloi miqve një gol për pozicion milimetrik jashtë loje.

Ndeshja përfundoi 1-0, falë golit të Sadio Mane, që mbylli në mënyrën e duhur një aksion fantastik të nisur me një top të gjatë që nga mesfusha në minutën e 43-të. Në minutën e tretë shtesë të pjesës së parë “Ujqit” barazuan me Pedro Neton, por edhe në këtë rast u kërkua ndihma e VAR-it. Futbollistët miq nuk mund t’u besonin syve kur panë kryesorin ta anulonte për pozicion jashtë loje.