Shefi i arbitrave të FIFA-s, Pierluigi Collina, ka mbrojtur përdorimin e teknologjisë në futboll, duke theksuar se ajo është futur për të ndihmuar arbitrat dhe për të garantuar vendime sa më të drejta në fushën e lojës.
Në një intervistë për La Gazzetta dello Sport, ish-arbitri i njohur italian tha se ishte paradoksale që mijëra tifozë në stadium mund të shihnin menjëherë përsëritjet e aksioneve, ndërsa i vetmi person që duhej të merrte vendimin, arbitri, nuk kishte këtë mundësi.
“Teknologjia u fut për të zgjidhur një situatë paradoksale. Në stadium, mbi 80 mijë spektatorë mund ta shihnin në kohë reale se çfarë kishte ndodhur në fushë, ndërsa i vetmi që nuk mund ta bënte ishte ai që duhej të merrte vendimin. Kishim dy alternativa: ose të krijonim një lloj komuniteti ‘Amish’ brenda stadiumit, ku teknologjia të ishte e ndaluar për të gjithë, ose t’u jepnim të njëjtën mundësi edhe arbitrave”, deklaroi Collina.
Ai shtoi se FIFA investon miliona euro në zhvillimin e teknologjive të arbitrimit, por shpresa është që ato të përdoren sa më pak.
“Shpresojmë që këto investime të rezultojnë të panevojshme. Kjo do të thotë se arbitrat kanë bërë një punë të shkëlqyer dhe nuk kanë pasur nevojë për ndërhyrjen e teknologjisë”, u shpreh ai.
Collina hodhi poshtë edhe pretendimet se teknologjia i zbeh emocionet e futbollit, duke argumentuar se një gol festohet gjithsesi dhe se konfirmimi i tij sjell edhe një moment të dytë gëzimi.
“Thuhet se teknologjia vret emocionin, por kjo nuk është e vërtetë. Futbollisti feston sapo shënon, ndërsa nëse goli konfirmohet, ka një festë të dytë. Nëse anulohet, feston skuadra kundërshtare. Është shumë më mirë që emocioni të mbështetet mbi një vendim të drejtë, sesa mbi një episod që do të diskutohet për javë, vite apo edhe dekada”, theksoi ai.
Për ta ilustruar këtë, Collina solli si shembull finalen e Kupës së Botës 1966, duke kujtuar se edhe pas gati gjashtë dekadash vazhdon debati nëse topi e kishte kaluar plotësisht vijën fatale në golin e Anglisë ndaj Gjermanisë.