Conte: Duhet kujdes, Milani vlen më shumë se pikët që ka!

Antonio Conte kërkon kujdes maksimal nga skuadra e tij në prag të derbit ndaj Milanit. Trajneri i zikaltërve ka lavdëruar kundërshtarët, ndërkohë që ka folur edhe për skemën, apo edhe për gjendjen e portierit Handanovic, që është ende në dyshim.

“Me derbin nisim një cikël ndeshjesh mjaft të rëndësishme, që duhet t’i trajtojmë me përqendrim dhe vlerësim maksimal. Sigurisht që Milani vlen shumë më tepër sesa pikët që ka në klasifikim dhe tani ka në përbërje edhe një kampion si Ibra, që i ka ndihmuar shumë. Duhet të bëjmë kujdes dhe të gjejmë mënyrën e duhur për të dalë me tre pikë nga kjo sfidë”, deklaroi tekniku zikaltër.

Për Handanovic është më mirë të flasin mjekët, pasi ata vlerësojnë më mirë gjendjen. Eriksen është një vlerë e shtuar për ne pasi ka cilësi të mëdha teknike, por normalisht që do t’i duhet pak kohë për të kuptuar idenë tonë të lojës dhe atë çfarë kërkoj si në planin ofensiv, ashtu edhe difensiv”, tha Conte.