Antonio Conte trajneri i Interit, pas suksesit 6-0 ndaj Brescias foli me superlativa për futbollistët e tij, por në të njëjtën kohë sulmoi mediat dhe të gjithë personat dashakeqës ndaj Interit, që sipas trajnerit e sulmojnë pa të drejtë ekipin, ndërkohë që nëse kanë diçka kundër skuadrës duhet të sulmojnë pikërisht Conten dhe jo futbollistët.
“Shënuam 6 gola dhe nuk pësuam asnjë dhe normalisht jemi të kënaqur. Disa duan ta shohin gotën gjysmë të zbrazur dhe jo gjysmë të mbushur. Ata duan të krijojnë probleme, por mua nuk më intereson kjo. Nëse doni të sulmoni dikë, më sulmoni mua e jo klubin e futbollistët.
Jemi duke punuar shumë, e kemi shfrytëzuar maksimalisht periudhën e izolimit për të provuar diçka ndryshe në aspektin taktik. Mund ta them që ekipi më ka pëlqyer kohët e fundit, pasi kam parë që idetë tona dhe ato që praktikojmë po realizohen. Në fund pastaj jo gjithmonë rezultati përputhet me lojën që bën. Gjithsesi kjo nuk do të thotë që gjithçka është e zezë. Kjo është një skuadër që nuk mund të qortohet për sakrificën, vendosjen e zemrës në fushë.
Duhet më shumë përqendrim, që të bëhen sa më pak gabime dhe të tregohemi sa më pak naivë në momente të caktuara. Momente të tilla mund të na heqin pikë dhe nga ana tjetër mund të na shkatërrojnë psikologjikisht. Mbi të gjitha kjo është një skuadër e re, që duhet rritur në aspektet e mësipërme”, u shpreh Conte pas fitores 6-0.