Cristiano Ronaldo martohet me Georgina Rodriguez, ceremonia në privatësi të plotë

Cristiano Ronaldo dhe Georgina Rodríguez janë zyrtarisht burrë e grua. Çifti i ka dhënë fund lidhjes së tyre prej gati një dekade, duke kurorëzuar martesën me një ceremoni civile të zhvilluar sot në Cascais, Portugali.

Sipas njoftimit të çiftit, ceremonia ishte “private dhe intime”, me praninë e pesë fëmijëve. Ronaldo dhe Georgina zgjodhën të mos publikojnë pamje nga ceremonia apo veshjet e tyre të dasmës, por e konfirmuan martesën përmes rrjeteve sociale.

Çifti publikoi një fotografi nga afër të duarve të tyre, me unazat e martesës të vendosura dhe të dukshme. Krahas imazhit ishte vetëm një mesazh i shkurtër: “CG”, shoqëruar me një zemër.

Ronaldo dhe Georgina janë në një lidhje që prej vitit 2017, kur modelja spanjolle punonte si asistente në një dyqan të Gucci-t. Marrëdhënia e tyre u bë publike po atë vit.

Së bashku, ata kanë dy vajza, Alana Martina dhe Bella Esmeralda. Ronaldo është gjithashtu babai i Cristiano Jr., si dhe binjakëve Eva dhe Mateo. Në vitin 2022, çifti përjetoi një tragjedi të rëndë pas humbjes së djalit të tyre, Ángel, gjatë lindjes.

Fejesa u bë publike në gusht 2025, kur Georgina tregoi në rrjetet sociale unazën e madhe të fejesës që kishte marrë nga ylli portugez.

Pas rreth nëntë vitesh së bashku, Ronaldo dhe Rodríguez kanë zgjedhur një martesë larg vëmendjes së madhe mediatike, duke ndarë me publikun vetëm një simbol të thjeshtë të “po”-së së tyre.