Cristiano Ronaldo shpjegon pse u përlot pasi humbi penalltinë ndaj Sllovenisë

Cristiano Ronaldo u përlot mbrëmjen e djeshme ndaj Sllovenisë pasi humbi një 11-metërsh. Pas përfundimit të lojës, ai shpjegoi shpërthimin e tij emocional. Në “ruletën ruse” të penalltive, Portugalia ia doli që falë 3 pritjeve të portierit Diogo Costa të kalonte Slloveninë, duke u kualifikuar në çerekfinale

Kur Bernardo Silva vendosi penalltinë e fundit në favor të Portugalisë, shumica e shokëve të tij u vërsulën menjëherë drejt golashënuesit, por Ronaldo, tashmë 39 vjeç, u pa të shijonte thuajse në heshtje këtë fitore. Pas ndeshjes, CR7 shpjegoi për mediat arsyen përse ai qau kur dështoi nga pika e bardhë përballë portierit slloven Oblak.

“Në fillim isha tepër i trishtuar, tani jam thjesht i lumtur. Ky është futbolli. Kështu ndodh në futboll. U përpoqa të vendosja ndeshjen, por nuk ia dola, humba penalltinë. Kjo është shumë e trishtueshme për mua dhe ka ndodhur rrallë. Prandaj më duhej të qaja. Ka momente që nuk mund të shpjegohen, ku thjesht kalon pasioni”, tha Ronaldo pas ndeshjes.