Daja dhe Dede, dy “D”-të që po e çojnë Shqipërinë në Europë

Futbolli shqiptar po përjeton një tjetër moment historik në arenën europiane dhe pas këtij suksesi qëndrojnë edhe dy emra të trajningut shqiptar: Ilir Daja dhe Nevil Dede. Dy trajnerë, dy histori të ndryshme, por i njëjti rezultat: Shqipëria po dërgon gjithnjë e më shumë skuadra në fazat e ligës së kompeticioneve europiane.

Nevil Dede shkroi një nga faqet më të bukura të karrierës së tij me Egnatian. Pas një periudhe ku puna e tij u shoqërua me pikëpyetje dhe kritika, trajneri shqiptar arriti të ndërtojë një skuadër konkurruese, të fitojë titullin kampion dhe tashmë ta udhëheqë Egnatian drejt një suksesi historik në Europë.

Mbrëmjen e së enjtes, Egnatia përmbysi humbjen 3-1 ndaj Shamrock Rovers, duke fituar 5-1 dhe duke siguruar kalimin në play-off-in e Europa League. Mbi të gjitha, rrogozhinasit garantuan pjesëmarrjen në fazën e ligës së Conference League, për herë të parë në historinë e klubit.

Në krahun tjetër është Ilir Daja, një nga trajnerët shqiptarë me përvojën më të madhe në Europë. Daja ka arritur të dërgojë skuadra shqiptare dhe kosovare në fazat e ligës europiane dhe këtë sezon po udhëheq Dinamon në aventurën e saj kontinentale.

Daja dhe Dede. Dy “D”-të e futbollit shqiptar që po e bëjnë Europën një realitet të prekshëm. I pari e ka kthyer eksperiencën europiane në një standard të karrierës së tij. I dyti po përjeton momentin e madh të konfirmimit, pasi nga dyshimet dhe paragjykimet kaloi te trofeu dhe tashmë te historia.

Dhe ndoshta kjo është pjesa më e bukur e suksesit të Dedes: ai nuk u dorëzua përballë zërave kritikë. Puna e tij mori përgjigjen më të mirë aty ku duhet të flasë një trajner, në fushën e lojës.

“Kjo fitore është për të gjithë futbollin shqiptar, jo vetëm për ne”, ishte mesazhi i Dedes pas triumfit.

Një fjali që përmbledh më së miri atë që po ndodh. Sepse suksesi i Egnatias dhe Dinamos nuk është vetëm sukses klubesh. Është një sinjal se futbolli shqiptar po fiton terren, po fiton besim.