Trajneri i Dinamos, Ilir Daja, ka folur në prag të sfidës së parë të play-off-it të UEFA Conference League ndaj Pafos, duke vlerësuar maksimalisht kundërshtarin, por edhe duke shfaqur besim te skuadra e tij.
Tekniku i bluve theksoi se Dinamo e ka merituar plotësisht mbërritjen në këtë fazë të kompeticionit, pas një rrugëtimi ku ka përballuar kundërshtarë të fortë si Astana, Aluminij dhe Auda.
“Dinamo shkon në Play Off-in e Conference League. Sigurisht që, derisa kemi arritur në këtë nivel, e kemi merituar, sepse kemi pasur ndeshje të forta si me Astanën, Aluminij apo Audën”, u shpreh Daja.
Trajneri kryeqytetas pranoi se përballja me Pafos do të jetë edhe më e vështirë, duke sjellë në vëmendje eksperiencën e skuadrës qipriote në arenën europiane.
“Natyrshëm që na pret një ndeshje më e vështirë me Pafos, sepse mjafton të kujtojmë që vetëm sezonin e kaluar kjo skuadër ishte në fazën e grupeve të Champions League”, deklaroi ai.
Megjithatë, pavarësisht diferencës në koeficient dhe eksperiencës së kundërshtarit, Daja kërkon që Dinamo të japë maksimumin që në sfidën e parë, e cila do të luhet në “Elbasan Arena”.
“E dimë që koeficienti i ndeshjes është i një niveli shumë të vështirë, por në fund fare do të bëjmë gjithçka për gjithçka, për të tentuar për të marrë maksimumin në ndeshjen e parë dhe më pas t’i marrim ndeshjet një e nga një”, përfundoi trajneri i Dinamos.