Kombëtarja shqiptare nis sot përgatitjet për dy ndeshjet e fundit të Ligës së Kombeve, ndërsa trajneri Rolando Maran ka zgjedhur ta fillojë grumbullimin me një gjest të veçantë për tifozët kuqezi.
Tekniku italian ka vendosur që seanca e parë stërvitore të jetë e hapur për publikun, duke u dhënë mundësinë mbështetësve të Kombëtares të ndjekin nga afër përgatitjet e skuadrës dhe të krijojnë një atmosferë sa më pozitive përpara dy sfidave vendimtare.
Ky vendim nuk është rastësor. Maran synon të afrojë sa më shumë tifozët me ekipin, duke e konsideruar mbështetjen e tyre një element të rëndësishëm për suksesin e Shqipërisë.
“Dëshirojmë të krijojmë një sinergji mes tifozëve, ekipit, lojtarëve dhe të gjithë atyre që e duan këtë fanellë. Në fund të fundit, ata janë motori dhe energjia e kësaj skuadre”, është shprehur trajneri italian.
Shqipëria vjen në këtë grumbullim në një pozicion të favorshëm, pasi kryeson Grupin C1 me nëntë pikë dhe synon ta përfundojë fazën në vendin e parë.
Përpara kuqezinjve janë dy përballje me shumë rëndësi. Fillimisht, më 12 nëntor, Shqipëria do të presë Finlandën në stadiumin “Air Albania”, në orën 20:45. Ndërsa sfida e fundit do të luhet më 15 nëntor në Budapest, ku skuadra e Maran do të përballet me Bjellorusinë, duke nisur nga ora 18:00.
Me dyer të hapura dhe një mesazh të qartë bashkimi, Maran kërkon që Kombëtarja ta nisë këtë fazë vendimtare me mbështetjen e plotë të tifozëve shqiptarë.