Daja shpërthen pas eliminimit: Nuk kam parë kurrë një arbitër të tillë në Europë, do t’i dërgojmë videot UEFA-s!

Dinamo City e mbylli aventurën europiane me kokën lart, por jashtë Pafos FC. Blutë u eliminuan në Limassol pas një ndeshjeje spektakolare, që përfundoi 4-2 pas 120 minutash, duke mos arritur të siguronin një vend në fazën e ligës së Conference League.

Skuadra e Ilir Dajës e nisi takimin në mënyrën më të mirë, duke kaluar në avantazh me Fadeiron. Pafos reagoi dhe përmbysi shifrat, por Dinamo nuk u dorëzua. Silva Richards riktheu baraspeshën në 2-2 dhe e dërgoi sfidën në kohën shtesë.

Në 30 minutat e fundit, skuadra qipriote shfrytëzoi avantazhin e terrenit dhe shënoi edhe dy herë, duke vulosur fitoren 4-2 dhe eliminimin e Dinamos. Megjithatë, pas ndeshjes, vëmendja e trajnerit Ilir Daja nuk u përqendrua vetëm te rezultati. Tekniku kryeqytetas kritikoi ashpër gjykimin dhe organizimin e sfidës, duke paralajmëruar edhe një ankesë pranë UEFA-s.

Daja pretendon se goli i parë i Pafos erdhi pas një faulli ndaj një lojtari të Dinamos, i cili, sipas tij, përfundoi edhe i gjakosur. Trajneri shqiptar ngriti gjithashtu pikëpyetje për sjelljen e personave të sigurisë dhe mënyrën e organizimit të ndeshjes.

“Nuk kam parë kurrë një arbitër të tillë në Europë. Goli i parë ishte faull dhe lojtari ynë u gjakos. Do t’i dërgojmë videot UEFA-s me gjithçka që ka ndodhur, edhe jashtë fushës”, deklaroi Daja pas ndeshjes.

Trajneri i Dinamos shkoi edhe më tej në kritikat e tij, duke e cilësuar organizimin si më të dobëtin që ka hasur në një ndeshje europiane. Pavarësisht zhgënjimit, Daja vlerësoi paraqitjen e skuadrës së tij. Ai theksoi se Dinamo konkurroi denjësisht përballë një kundërshtari me më shumë cilësi dhe burime financiare, ndërsa kujtoi se Pafos sezonin e kaluar kishte luajtur në Champions League.

“Ne luajtëm mirë kundër një kundërshtari të fortë. Lojtarët e mi dhanë gjithçka deri në fund. Me ndryshimet, i vendosëm disa lojtarë në pozicione jo natyrale. Jemi krenarë për performancën që treguam kundër një skuadre që luajti në Champions League sezonin e kaluar”, u shpreh tekniku.