David Alaba dëmtohet sërish, humbet sfidat me Juven dhe Barcelonën

Problemet fizike të David Alabës duket se nuk kanë fund. Mbrojtësi austriak, që u detyrua të largohej në pushimin e pjesës së parë të ndeshjes së La Liga-s kundër Getafe të dielën mbrëma, ka pësuar një mbingarkesë muskulare në këmbën e djathtë, sipas raportimeve nga COPE.

Ky dëmtim do ta detyrojë 33-vjeçarin të mungoje në dy sfidat vendimtare të Real Madridit: të mërkurën në Ligën e Kampionëve kundër Juventusit dhe të dielën në El Clásico ndaj Barcelonës.

Ky është një tjetër ndalesë në kalvarin e gjatë të dëmtimeve për ish-lojtarin e Bayern Munichut, i cili që prej mbërritjes në Madrid në verën e vitit 2021 nuk ka arritur të gjejë vazhdimësi për shkak të problemeve të shumta fizike.

Megjithëse Alaba gëzon respekt të madh në dhomat e zhveshjes falë përvojës dhe udhëheqjes së tij, forma e tij ka pësuar rënie të ndjeshme, me mbrojtësin që ka humbur shumë ndeshje për shkak të dëmtimeve muskulare dhe artikulare. Nën kontratë deri në qershor 2026, e ardhmja e tij në “Santiago Bernabéu” është tashmë në pikëpyetje.