​De Biasi shpall listën për miqësoren me Kosovën, risitë Veseli dhe Manaj

Trajneri i Kombëtares shqiptare, Gianni De Biasi, shpalli listën me  25 lojtarë për dy ndeshjet miqësore të nëntorit.   

“Janë dy miqësore ku do të testojmë disa lojtarë të rinj duke parë gjendjen e të gjithëve dhe duke u përpjekur të risim nivelin e lojës tonë”, ka thënë De Biasi.

“Do punojmë fort që të përmirësohemi akoma më shumë dhe të jemi gati për Evropianin. Siguruam miqësoren me Gjeorgjinë pasi ishte e vetmja skuadër e disponueshme dhe ekipet e tjera që kërkuam nuk ishin të lira”, shtoi më tej trajneri italian.

“Disa nga lojtarët e përhershëm i kam lenë pushim pasi edhe kanë pasur probleme fizike, si Kukeli, apo Mavraj që është pothuajse gati për të luajtur”, ka përfunduar De Biasi.

Në listën e De Biasit bie në sy prania e dy lojtarëve të rinj si Rei Manaj dhe Frederik Veseli, të cilët veshin për herë të parë fanellën e Përfaqësueses. Veseli është mbrojtës dhe luan te Lugano në Zvicër. Mosha e tij është 23 vjeç dhe mesa duket ai bën pjesë në planet e De Biasit.

Pas miqësores me Kosovën, Shqipëria do të luajë tre ditë më vonë në Tiranë edhe një miqësore tjetër me Gjeorgjinë.