E ardhmja e Napolit mund të sjellë një ndryshim të madh pronësie. Aurelio De Laurentiis ka vendosur çmimin për shitjen e klubit italian, duke kërkuar plot 2 miliardë euro. Ndërkohë, sipërmarrësi amerikan Matt Rizzetta është i interesuar për blerjen, por oferta e tij është dukshëm më e ulët.
Napoli mund të hyjë në një kapitull të ri, pasi presidenti Aurelio De Laurentiis duket gjithnjë e më i gatshëm të shqyrtojë mundësinë e shitjes së klubit. Sipas raportimeve të mediave italiane, kreu i napolitanëve është takuar në një hotel në Napoli me Matt Rizzettën, biznesmenin amerikan që synon të ndërtojë një projekt të gjerë sportiv në qytet.
Të dy kanë ndjekur së bashku edhe ndeshjen e Champions League kundër Bodo/Glimt, ndërsa takimi i tyre i fundit është cilësuar si miqësor. Megjithatë, pengesa kryesore mbetet çmimi. De Laurentiis e vlerëson Napolin me 2 miliardë euro, duke argumentuar se klubi nuk përfaqëson vetëm një skuadër futbolli, por edhe një markë me miliona tifozë në Itali dhe në mbarë botën.
Nga ana tjetër, Rizzetta, i cili ka shfaqur interes për të marrë nën kontroll klubin, është i gatshëm të ofrojë rreth 1.3 miliardë euro. Amerikani nuk synon blerjen e një pakice aksionesh, por një projekt të plotë, që përfshin edhe modernizimin e stadiumit Diego Armando Maradona.