De Ligt: E nisa si mesfushor, me fat që luaj me lojtarë të mëdhenj

Matthijs De Ligt nuk e pati të lehtë përshtatjen te “Zonja e Vjetër”, por me kalimin e kohës tregoi personalitet dhe e vuri situatën nën kontroll. Në një prononcim për “Champions Journal”, qendërmbrojtësi  holandez foli për karrierën e tij, se si kishte ndryshuar rol kur luante me moshat e reja.

“Deri në moshën 15 vjeç kam qenë mesfushor me tipare sulmuese. Kam luajtur shumë ndeshje në atë rol, kam shënuar disa gola e kam dhënë asistime. Pastaj, papritmas, më thanë se për karrierën time do të ishte më mirë të zhvendosesha më pas, si qendërmbrojtës.

Në fillim u mendova, nuk më pëlqente të luaja mbrojtës, por tani po kuptoj se mënyra si u rrita, si mesfushor, po më ndihmon. Jam vërtet i lumtur me zhvillimin e karrierës sime”.

Kombëtarja? Është fantastike të luash me Van Dijk, një nga lojtarët më të mirë në botë. Mendoj se jemi një dyshe e mirë në qendër të mbrojtjes. E njëjta gjë te Juventusi, me Bonuccin dhe Chiellinin. Janë lojtarë me përvojë të madhe, përpiqem të mësoj sa më shumë prej tyre”, deklaroi De Ligt.