Debutimi i Portugalisë në Botëror shkakton debat politik, parlamentarët refuzojnë ftesën për ndeshjen në SHBA

Ndeshja e parë e Portugalia në Botërorin 2026, kundër Kongos në Houston, është shoqëruar me polemika politike në Portugali pas një ftese të veçantë të bërë nga Federata Portugeze e Futbollit. Sipas mediave portugeze, Federata Portugeze e Futbollit u kishte drejtuar një ftesë krerëve të grupeve parlamentare për të udhëtuar në Shtetet e Bashkuara dhe për të ndjekur nga afër ndeshjen e kombëtares.

Fillimisht, disa prej të ftuarve, veçanërisht drejtues të partive të djathta dhe të qendrës së djathtë, kishin shfaqur gatishmëri për ta pranuar ofertën. Megjithatë, rregullorja parlamentare ndalon deputetët të marrin dhurata me vlerë mbi 150 euro, pasi kjo mund të konsiderohet si cenim i pavarësisë së mandatit të tyre.

Edhe pse rregullorja parashikon përjashtime për ftesat dhe ofertat e mikpritjes që u drejtohen partive politike dhe jo individëve, iniciativa e Federatës shkaktoi reagime të forta në arenën politike.

Një nga zërat më kritikë ishte deputeti i Bloco de Esquerda, Fabian Figueiredo, i cili kërkoi publikisht që në vend të tij Federata të dërgonte në SHBA një person të prekur nga fatkeqësitë natyrore të dimrit të kaluar ose një punonjës të Mbrojtjes Civile.

Për shkak të debatit të krijuar, shumica e drejtuesve të grupeve parlamentare vendosën të refuzojnë ftesën. Në fund, i vetmi përfaqësues institucional që do të jetë i pranishëm në Houston është José Pedro Aguiar-Branco.

Interesimi për debutimin e Portugalisë në Botëror është kaq i madh, saqë seanca tradicionale e pyetjeve parlamentare, e zhvilluar dy herë në javë, u zhvendos një orë më herët këtë të mërkurë, për t’u mundësuar deputetëve të ndjekin ndeshjen që nis në orën 18:00 sipas kohës portugeze.