Dëmtimi i Ndoj, trajneri i i Brescias jep lajme pozitive pas ndeshjes

Brescia regjistroi fitoren e dytë radhazi në Serie A, pasi mposhti 3-0 Leccen dhe iu largua fundit të klasifikimit. Por në këtë sfidë Emanuele Ndoj la fushën pas 30 minutash lojë për shkak të një dëmtimi.

Mendohej diçka shumë më serioze për mesfushorin shqiptar, por mesa duket Ndoj nuk ka ndonjë problem serioz, siç e ka konfirmuar edhe trajneri i “dallëndysheve” Eugenio Corini, i cili e ka komentuar kështu zëvendësimin e parakohshëm të lojtarit të dalë nga akademia e Romës.

“Ndoj ka pasur një problem në kavilje gjatë verës dhe nuk doja ta rrezikoja më shumë. Një mungesë e mundshme e tij, do të na krijonte shumë vështirësi në të ardhmen”, deklaroi Eugenio Corini.