Depay zgjedh Barcelonën dhe trajnerin Koeman për të ardhmen

Ronald Koeman do të ketë sulmuesin e tij të preferuar sezonin e ardhshëm te Barcelona, Mephis Depay. Sipas mediave spanjolle, 27-vjeçari holandez ka nisur kërkimet për të gjetur shtëpi në Barcelonë, pasi është i bindur t’i bashkohet klubit katalanas në fund të sezonit, kohë kur i skadon edhe kontrata me francezët e Lyonit.

Sulmuesi holandez ka shkëlqyer me fanellën e “tulipanëve” në kohën kur trajner ishte pikërisht Koeman, që aktualisht është sponsori kryesor për transferimin e tij në “Camp Nou”, aty ku do të udhëheqë repartin e avancuar.

I rritur te holandezët e PSV Eindhoven, Depay u transferua me bujë te Manchester United në verën e 2014-ës, por nuk ia doli të lërë gjurmë në “Old Trafford’, ndërsa 5 sezonet e fundit ka qenë pjesë e Lyonit ku ka shënuar 75 gola në 176 ndeshje.