Dinamo nuk shkoi më shumë se barazimi 1-1 ndaj Pafos në “Elbasan Arena”, në ndeshjen e parë të raundit të fundit kualifikues të Conference League. Blutë zhvilluan një pjesë të dytë të mirë dhe krijuan disa mundësi të pastra, por në fund u detyruan të kënaqen me një rezultat që e lë gjithçka të hapur për sfidën e kthimit.
Pjesa e parë ishte më e ekuilibruar, ndërsa momenti më i rëndësishëm erdhi në minutën e 36-të. Pas një prekjeje me dorë të Usni Ismailit në zonë, gjyqtari akordoi penallti për Pafos. David Luiz mori përsipër ekzekutimin, por goditja e tij përfundoi jashtë kuadratit.
Dinamo pati mundësinë më të mirë para pushimit në kohën shtesë. Hekuran Berisha u gjend i vetëm përballë portierit kundërshtar, por nuk arriti ta dërgonte topin në rrjetë.
Në minutën e 68-të, Ismaili lëshoi një goditje të fortë, e cila u devijua në çastin e fundit dhe nuk përfundoi në rrjetë. Një minutë më vonë, Pafos shënoi, por goli u anulua për një faull ndaj Përndrecës pas një rivënieje të gjatë anësore.
Goli i shumëkërkuar nga Dinamo erdhi në minutën e 78-të. David Fadairo, i cili sapo kishte hyrë në fushë, u tregua i saktë para portës pas një asistimi të bukur nga Adamu Alhassan, duke kaluar vendasit në avantazh.
Por festa e Dinamos zgjati vetëm pak minuta. Në të 82-tën, Pafos fitoi një tjetër penallti pas ndërhyrjes së Lorenco Vilës ndaj kundërshtarit brenda zonës. Lele këtë herë nuk gaboi dhe vendosi shifrat në 1-1.
Në fund, skuadra qipriote ishte pranë përmbysjes. Goditja e Pafos u përplas në shtyllë dhe më pas topi përfundoi në duart e portierit Teqja. Kualifikimi në fazën e Conference League do të vendoset në ndeshjen e kthimit në Qipro, me të dyja skuadrat që nisen nga një pozicion i barabartë.