Dinamo është vetëm një ndeshje larg një momenti historik, si në aspektin sportiv ashtu edhe në atë financiar. Skuadra e Ilir Dajës do të përballet të enjten në orën 19:00 me Pafosin në Qipro, në ndeshjen e kthimit të play-off-it të Conference League.
Pas barazimit 1-1 në Elbasan, gjithçka mbetet e hapur për kualifikimin. Një fitore në Qipro do t’i siguronte Dinamos për herë të parë në histori pjesëmarrjen në fazën e ligës së një kompeticioni europian, duke e futur klubin në një tjetër dimension.
Por përveç rëndësisë sportive, sfida me Pafosin ka një peshë të madhe edhe në aspektin financiar. Deri tani, Dinamo ka arkëtuar 1.45 milionë euro nga UEFA, falë kalimit të tureve në Conference League.
Nëse “Blutë” arrijnë të eliminojnë kampionët qipriotë, në arkat e klubit do të shtohen edhe 1.72 milionë euro. Në këtë mënyrë, vetëm nga shpërblimet e UEFA-s gjatë kësaj vere, Dinamo do të arrinte në një total prej 3.17 milionë eurosh, pa llogaritur të ardhurat nga të drejtat televizive, sponsorët dhe shitja e biletave.
Kalimi në fazën e ligës do të sillte të ardhura edhe më të mëdha, pasi çdo ndeshje europiane do të kishte një shpërblim të veçantë.
Presidenti Adrian Bardhi ka vendosur gjithashtu një motivim të rëndësishëm për skuadrën. Në rast kualifikimi, futbollistët dhe stafi do të përfitojnë një premio prej 500 mijë eurosh.
Bardhi kishte tërhequr vëmendjen edhe pas barazimit në ndeshjen e parë, kur zbriti në dhomat e zhveshjes dhe shpërndau rreth 90 mijë euro shpërblime për lojtarët.