Dinamo triumfon ndaj Vllaznisë në startin e “Final 4” në Superiore

Dinamo City e ka nisur me fitore fazën “Final 4” të Kategoria Superiore, pasi mposhti 2-0 Vllazninë në sfidën e zhvilluar në stadiumin Air Albania Stadium.

Takimi, që hapi zyrtarisht garën për titullin kampion të sezonit 2025/2026, u karakterizua nga një pjesë e parë e balancuar, me pak raste konkrete për gol dhe me rrjeta të paprekura deri në pushim.

Momenti që ndryshoi rrjedhën e ndeshjes erdhi në minutën e 69-të, kur Melos Bajrami u ndëshkua me kartonin e dytë të verdhë pas ndërhyrjes ndaj Bernard Berisha, duke lënë Vllazninë me 10 lojtarë.

Dinamo përfitoi menjëherë nga superioriteti numerik dhe arriti të zhbllokojë rezultatin në minutën e 77-të me golin e Malomo, i cili finalizoi asistin e Qardaku.

Në minutat shtesë, skuadra kryeqytetase vulosi fitoren me golin e dytë, duke siguruar tre pikë të rëndësishme në nisje të fazës finale. Me këtë sukses, Dinamo e nis në mënyrën më të mirë garën për titullin, ndërsa Vllaznia, që konsiderohej favorite para sfidës, regjistron humbjen e parë në këtë fazë.

Ndeshja tjetër e “Final 4” do të zhvillohet nesër mes Elbasanit dhe Egnatias.