Duka: Natë e madhe për futbollin shqiptar, urime Dinamos dhe Egnatias

Presidenti i Federatës Shqiptare të Futbollit, Armand Duka, ka përshëndetur përmes një postimi në rrjetet sociale sukseset e Dinamo City dhe Egnatias në arenën europiane.

Duka e ka cilësuar një “natë të madhe për futbollin shqiptar” mbrëmjen e kualifikimeve, teksa të dyja skuadrat shqiptare arritën përmbysje spektakolare dhe siguruan kalimin në fazën play-off të kompeticioneve europiane.

“Urime Dinamo City për fitoren 4-0 ndaj Audas dhe kalimin në play-off të UEFA Conference League, si dhe Egnatias për triumfin 5-1 ndaj Shamrock Rovers dhe kualifikimin në play-off të UEFA Europa League”, shkruan Duka.

Në vëmendjen e presidentit të FSHF-së është veçanërisht Egnatia, e cila me këtë rezultat ka siguruar tashmë pjesëmarrjen në fazën e grupeve të Conference League, duke regjistruar një tjetër arritje të rëndësishme në historinë e klubit dhe të futbollit shqiptar.

Duka ka mbyllur mesazhin e tij me urimin për dy skuadrat shqiptare për sfidat e radhës në Europë.

“Tani, të gjithë sytë te sfidat e fundit! Suksese Dinamos dhe Egnatias në aventurën europiane!”, përfundon ai.