Duka tenton sërish, Samir Mane tundohet nga përfshirja në futboll

Lajme Sporti E Mërkurë, 23 Shtator 2026 16:55

Presidenti i Federatës Shqiptare të Futbollit, Armand Duka, duket se nuk ka hequr dorë nga një prej synimeve të tij të hershme: afrimi i biznesit të madh në futbollin shqiptar.

Prej kohësh, Duka ka bërë thirrje për një përfshirje më të madhe të sipërmarrësve në sport, duke e konsideruar të domosdoshme që klubet shqiptare të mbështeten gjithnjë e më shumë nga investimet private dhe jo vetëm nga fondet publike.

Në këtë kuadër, një prej emrave që Duka ka tentuar të afrojë në futboll është biznesmeni i njohur Samir Mane. Dhe këtë herë duket se tentativa mund të ketë dhënë rezultat.

Një video e publikuar në rrjetet sociale tregon Armand Dukën dhe Samir Manen së bashku në Bergamo në një agroturizëm, teksa diskutojnë edhe për futbollin. Në bisedë, Mane shprehet se futbolli shqiptar aktualisht nuk prodhon të ardhura, por lë të kuptohet se kjo nuk e përjashton mundësinë e një investimi.

“Futbolli shqiptar nuk prodhon para”, shprehet Mane, ndërsa më pas pranon se mund të provohet investimi edhe për pasion.

Kjo deklaratë ka rikthyer në vëmendje mundësinë që një prej biznesmenëve më të njohur në vend të përfshihet në futbollin shqiptar. Për momentin, megjithatë, mbetet e paqartë nëse Mane do të investojë në një klub konkret dhe, nëse po, cili do të jetë ai.

Nëse projekti do të konkretizohej, do të ishte një zhvillim i rëndësishëm për futbollin shqiptar, duke sjellë një tjetër emër të fuqishëm të biznesit vendas në një sektor që prej vitesh kërkon më shumë kapital privat. “E treta, e vërteta”, mbetet ta shohim …