Dy dëmtime tronditin Spanjën në Kupën e Botës, De La Fuente: Shpresoj të mos jetë asgjë serioze!

Spanja mund të ketë marrë një tjetër goditje të rëndë në prag të fazës me eliminim direkt të Kupës së Botës. Pas dëmtimit të Yeremi Pinos, shqetësim ka shkaktuar edhe gjendja e Nico Williams, i cili u aktivizua si zëvendësues në ndeshjen ndaj Uruguait.

Sulmuesi i Athletic Bilbaos ka ndier shqetësime muskulore gjatë takimit, duke ngritur alarmin në kampin e “La Roja”. Trajneri Luis de la Fuente tha se është ende herët për të dhënë një diagnozë të saktë.

“Do të presim dhe do të shohim. Për momentin ai ndien dhimbje. Mund të jetë thjesht lodhje muskulore”, u shpreh tekniku spanjoll.

Gjatë ndeshjes, Nico Williams ishte gjithashtu viktimë e një ndërhyrjeje shumë të ashpër nga uruguaiani Nicolás De La Cruz, i cili u ndëshkua vetëm me karton të verdhë. Përplasja mes futbollistëve shkaktoi tension në fushë dhe për pak sa nuk degjeneroi në një përleshje mes lojtarëve.

Ndërkohë, lajmet nuk janë aspak pozitive për Yeremi Pinon. Sipas trajnerit De la Fuente, sulmuesi dyshohet se ka pësuar frakturë në klavikulë dhe do t’u nënshtrohet ekzaminimeve mjekësore për të konfirmuar diagnozën.

“Fatkeqësisht mendojmë se bëhet fjalë për një dëmtim në klavikulë. Nesër do të kryejë analizat. Ai po vuan shumë dhe përpjekja që bëri për të qëndruar në fushë deri në fund ishte e jashtëzakonshme. Ishte heroik. I jam shumë mirënjohës dhe besoj se edhe shokët e skuadrës e vlerësojnë sakrificën e tij”, deklaroi De la Fuente.

Dy dëmtimet mund të komplikojnë planet e Spanjës për ndeshjet e fazës së 1/16-ave, ndërsa stafi teknik pret rezultatet e ekzaminimeve për të kuptuar shkallën e problemeve fizike të dy futbollistëve.