Shqipëria e ka sulmin e garantuar, teksa nuk mungojnë lajmet pozitive në këtë repart për Rejën. Pas Rey Manajt dhe Giacomo Vrionit, lajmi i madh vjen tashmë nga Anglia, teksa Armando Broja ka nënshkruar kontratën e parë profesionale me klubin e Chelsea-t. Sulmuesi i talentuar ka qenë deri më tani pjesë e moshave të skuadrës së Bluve të Londrës duke shkëlqyer në shumë ndeshje.
18-vjeçari është vlerësuar shumë nga trajneri Lampard, pasi ka shkëlqyer në grupmoshën deri në 19 vjeç. Strategu anglez e ka përfshirë në shumë seanca stërvitore me skuadrën e parë, ndërkohë që tashmë drejtuesit kanë vendosur që t’i japin mundësinë për të nënshkruar kontratën e parë në mënyrë që të mos ta humbasin nga ndonjë ofertë e papritur në merkato.
“Jam shumë i lumtur për kontratën profesionale me Chelsea-n. Falënderoj prindërit e mi që më kanë mbështetur gjithmonë sepse pa ta nuk mund të isha këtu”, ka shkruar bomberin ë rrjetet sociale.
Broja me siguri që është një nga talentet që shihet me syrin më pozitiv nga trajneri Lampard, teksa nuk përjashtohet mundësia që ta thërrasë edhe në skuadrën e parë. Ai ka bërë një punë të shkëlqyer me talentet e rinj deri më tani.
18-vjeçari i lindur në Slough të Anglisë, por me prindër me origjinë shqiptare ka një “uri” të paparë për golin. Këtë sezon ka shënuar 16 n 28 ndeshje, një shifër e frikshme për një lojtarë të moshës së tij. Ai është edhe pjesë e grupmoshës U-21 me kombëtaren tonë, duke shënuar 3 gola në 2 ndeshje, ndërkohë që më parë ka shënuar 5 gola në 4 ndeshje me grupmoshën deri në 19 vjeç. /Rozalb Lika-Koha Jone/