Zbulohet raporti sekret i policisë amerikane, kërcënime me bombë për Messin dhe Ronaldon gjatë Botërorit

Një dokument i rrjedhur i sigurisë së policisë amerikane ka zbuluar përmasat e kërcënimeve që shoqëruan Kupën e Botës, duke përfshirë plane të dyshuara terroriste, kërcënime me vdekje ndaj yjeve më të mëdhenj të futbollit dhe presion ndaj arbitrave të turneut.

Sipas një raportimi të publikuar nga The Sun, bazuar në një dosje të sigurisë së publikuar nga Informacion.es, kombëtarja e Argjentinës dhe Lionel Messi ishin ndër objektivat kryesorë të kërcënimeve.

Para ndeshjes së Argjentinës ndaj Jordanisë, një person telefonoi aeroportin e Dallasit duke kërcënuar se do të hynte në stadium së bashku me dy persona të tjerë të armatosur me granata dhe një pushkë AR-15.

Personi deklaroi se do të sulmonte policinë dhe lojtarët e të dyja skuadrave, duke përmendur në mënyrë të drejtpërdrejtë Lionel Messin si objektiv për t’u vrarë.

Një situatë e ngjashme u regjistrua edhe para sfidës së Argjentinës me Egjiptin. Një nga të dyshuarit shkroi në rrjetin social X se do të hynte në stadiumin e Atlantës dhe do të shpërthente veten me katër bomba të lidhura në trup, me synim sulmin ndaj Messit.

Gjatë së njëjtës ndeshje, policia mori një tjetër alarm për bomba të dyshuara në koshat e mbeturinave të tribunave. Menjëherë u zhvillua një kontroll i gjerë me ekspertë të lëndëve plasëse dhe qen të specializuar për zbulimin e eksplozivëve.

Në shënjestër të kërcënimeve ishte edhe Cristiano Ronaldo. Një punonjës i FIFA-s raportoi se një person i dyshimtë kishte kërkuar informacion për hotelin ku qëndronte ylli portugez.

Në një tjetër rast, një tifoz hyri në hotelin e Ronaldos dhe tentoi të hynte në ashensor bashkë me të. Kur u ndalua nga policia, ai pretendoi se dëshironte vetëm të bënte një foto me futbollistin.

Edhe zyrtarët e ndeshjeve u përballën me presion ekstrem. Arbitri francez François Letexier mori më shumë se 6 mijë mesazhe kërcënuese në ËhatsApp pas vendimeve të tij gjatë ndeshjes Argjentinë–Egjipt.

Ndërkohë, arbitri i VAR-it, Ëilly Delajod, u përball me kërcënime me vdekje nga tifozë egjiptianë të zemëruar.

Kërcënimet nuk prekën vetëm yjet kryesorë. Edhe lojtarë që humbën raste vendimtare u kthyen në objektiv të sulmeve online. Norvegjezi Alexander Sørloth dhe bashkëshortja e tij morën kërcënime me vdekje pasi ai nuk i pasoi topin Erling Haalandit në çerekfinalen ndaj Anglisë.

Një fat të ngjashëm pati edhe kolumbiani Jaminton Campaz, pas humbjes së një penalltie vendimtare. Për shkak të situatës, ai nuk mundi të rikthehej menjëherë me pjesën tjetër të kombëtares. Incidentet rikujtojnë rastin tragjik të mbrojtësit kolumbian Andrés Escobar, i cili u vra në vitin 1994 pas një autogoli të shënuar në Kupën e Botës.

Pas eliminimit nga Franca, tifozë të Paraguait dogjën një figurë me emrin e Kylian Mbappé, ndërsa ylli francez u përball edhe me thirrje raciste, përfshirë një sulm verbal nga një senator paraguajan.

Edhe kombëtarja e Koresë së Jugut u vendos nën mbrojtje të shtuar pas eliminimit në fazën e grupeve. Trajneri Hong Myung-bo u bë objekt i zemërimit publik dhe policia nisi hetime mbi mënyrën e emërimit të tij.

Edhe kampi i Anglisë pati një alarm sigurie. Qendra mediatike e ekipit pësoi një shkelje sigurie pasi një person hyri duke mbajtur një çelës metalik dhe duke bërtitur.

Pas këtij incidenti, zona u kthye në një strukturë të blinduar me tre rreshta sigurie, barriera betoni dhe masa kundër sulmeve nga distanca. U vendos edhe një zonë ndalim-fluturimi për dronët, ndërsa forca të armatosura policore u shpërndanë në gjithë territorin.

Sipas dokumentit të sigurisë, ky Botëror u konsiderua si edicioni më i mbrojtur dhe më i fortifikuar në historinë e turneut, për shkak të nivelit të lartë të kërcënimeve dhe masave të jashtëzakonshme të sigurisë.