E kërkoi me ngulm Leverkuseni, Fabregas vendos të qëndrojë te Como

Pas javësh spekulimesh mbi të ardhmen e tij, Cesc Fabregas ka vendosur të qëndrojë në krye të Como-s, duke konfirmuar besimin në projektin ambicioz të klubit italian. Lajmi është bërë i ditur nga Sky Sport, që raporton se kontaktet intensive me drejtuesit ditët e fundit kanë qenë vendimtare për vendimin e trajnerit spanjoll.

Pavarësisht interesimit nga klube të mëdha si Roma dhe, mbi të gjitha, Bayer Leverkusen – që do të mbetet pa Xabi Alonson pas kalimit të tij te Real Madrid – Fabregas ka preferuar të vazhdojë rrugëtimin e nisur në Como.

Trajneri ka një kontratë të vlefshme deri në qershor 2028, dhe megjithëse nuk pritet një zgjatje tjetër për momentin, është i mundshëm një përmirësim i kushteve ekonomike.

Fabregas u bashkua me Como-n në vitin 2022 fillimisht si lojtar, duke e mbyllur aty karrierën aktive. Më pas mori drejtimin e ekipit Primavera dhe më pas të skuadrës së parë, me të cilën arriti promovimin historik në Serie A në sezonin 2023/24, pas 21 vitesh mungesë, dhe më pas siguroi mbijetesën me lehtësi në sezonin aktual.