“Edhe sa gola do i falni Milanit?”, zbulohet fjalimi i Contes që solli përmbysjen epike të Interit

Interi mori një përmbysje spektakolare ndaj Milanit në fundjavë, teksa i mbylli ndeshjen në shifrat 4-2. Pas një pjese të parë shumë të dobët dhe të dominuar nga kuqezinjtë, Antonio Conte i futi lojtarët me një tjetër ritëm në fushë në fraksionin e dytë.

Strategu italian nuk zgjodhi një reagim të ashpër dhe nervoz, por diskutoi qetësisht me të tijtë, duke u kujtuar se para ndeshjes kishin 19 pikë diferencë me Milanin dhe se ishin dukshëm më të fortë, por këtë duhet ta tregonin në fushë.

“Edhe sa gola keni ndërmend t’i falni Milanit sot? Ata që deri para ndeshjes kishin grumbulluar 19 pikë më pak se ju, sot po duken lojtarë të mëdhenj. Ju jeni shumë më të fortë, por këtë duhet ta tregoni në fushë”, tha ndër të tjera Conte, duke zgjuar shpirtin e reagimit në skuadër.

Futbollistët zikaltër ia shpërblyen duke barazuar rezultatin në harkun e tre minutave, ndërkohë më vonë shënuan edhe dy gola të tjerë.